太陽報刊登HT 1989 joker評論稿


太陽報刊登HT 1989 joker評論稿

2021-01-10 AC模玩網

太陽報刊登HT 1989 joker評論稿

時間:2011-09-01 09:56:00   來源:   責任編輯:夏娜天使醬

  HT早些日子的公布的DX系列THE JOKER-1989版不僅引起了12寸可動玩家的收藏狂潮,也受到了新聞界的廣泛關注。前些日子香港太陽報就發表了一篇關於此款 JOKER 的評論稿。附上新聞稿原文:

  唔只蝙蝠俠家喻戶曉,佢嘅死對頭一樣深入民心,要選人氣No.1嘅歹角,一定非小丑Joker莫屬;角色設計瘋癲得嚟又食腦,仲先後被兩位好戲之人飾演,一個係已故嘅Heath Ledger;另一個就係Jack Nicholson,想唔入腦都難。前者,Hot Toys已經將佢轉化爲神檯級Figure,至於Nicholson版本,經過多年肖像權洽商,如今終於落實,由頭雕到服飾再到Parts,都堪稱鬼斧神工,絕對係Figure界嘅丑生王!

  Ledger飾演Joker之前,喺影迷心目中,Joker就等於Nicholson,所以當後者被飛出《The Dark Knight》時,嬲到公開炮轟導演Christopher Nolan︰「我好嬲!佢從來冇問過我想唔想再演Joker,我識得點去演,冇人比我做得更好!」筆者唔係影評人,冇資格話邊個好戲啲,但都見到Nicholson幾重視呢個角色,唔怪得傾咗咁多年,佢老人家先肯批個肖像權畀HT。

事先張揚 丑角陸續有嚟
  世上無難事,只怕有心人,HT老闆Howard早喺公司成立初期,就有製作Joker嘅念頭︰「Batman同Joker係我細個已經好鍾意嘅角色,將佢哋Figure化自然係多年夢想。其實版權好多年前已經開始傾,不過電影公司推說冇適合部門負責,經過多番遊說,又向Nicholson交出一份詳細嘅Proposal後,對方終於喺去年應承,我哋就喺緊接嘅東京10周年回顧展宣布呢個令人振奮嘅消息。」嘔心瀝血傾到版權,Joker當然唔只一個版本咁大嘥,HT有意將Joker系列長做長有,加埋Batman、Batmobile及Batwing,蝙蝠迷相信有排「受」!

獨有眼神 似到嚇親人
  講到今次嘅新版Joker,筆者自自然然諗番去年嘅HT 10周年展覽,同一班韓國雕頭大師提起呢款作品,Yulli講笑話爲咗爭取呢份差事,曾經同Kojun等幾位高手打大交,證明呢款Joker幾有吸引力!實物所見,真係可以用「神作」嚟形容,唔只輪廓、皺紋、雙下巴等特徵都似足真人,就連嘴脣嘅開合程度、牙齒嘅大細排列都照顧周到;而且貴爲DX系列,雙眼自然用埋PERS轉動系統,更抵贊係眼珠、眼白嘅顏色比以前更加準確,超像真還原Joker癲得嚟又有懾服力嘅眼神。美中不足係頭髮仍然係啤膠處理,頭雕亦只得1個,如果送多個溶妝或卸妝頭就真係無懈可擊。

全身行頭 講究到暈
  另一方面,HT近年嘅造衫水平,分分鐘勁過車衣廠,只要劇照齊備,要佢哋變成1:6比例根本冇難度。今次Joker以電影尾段同Batman決戰嗰幕爲藍本,所以有齊紫色「踢死兔」、藍色格仔西褲、橙色恤衫及波點領帶,紳士帽亦唔係膠件,用咗織帽吸塑技術合製,帶絨面兼有彈性,勁有質感。而且爲咗令套衫更稱身,用咗T-1000嘅平胸窄膊款Body,再加入大量海綿營造發福體形。配件方面,毒襟花、啤牌、美鈔、防毒面具、遙控器、大喇叭、拐杖、玩具手鎗統統有齊,最正係有埋超長左輪1把,重演由褲管拔槍嘅經典一幕。

熱門玩具DX07《蝙蝠俠》 1/6 Joker(傑克·尼科爾森版)
圖中爲試辦款式,與正式推出的版本或有少許分別。

Body由T-1000改造而成,加入大量海綿增肥,關節就有30個。

踢死兔可以掛埋有毒襟花,使唔使跟到咁足呀?

跟足電影設定,忠實做埋波點領帶及橙色恤衫。

紳士鞋算係全身像真度最差嗰Part,不過勝在除得到,唔係同Body啤埋一齊。

送埋啤牌及美鈔,全部依足比例製成。

士的、左輪、對講機統統有齊,最頂癮係超長身左輪。

圖中只係部分造型手掌,據知正式推出時有成8隻咁多。

今次Joker出自Yulli(左)及J.C.Hong(右)呢Pair黃金組合,佢哋話製作Nicholson版Joker係多年心愿,依家終於成真,製作時都分外肉緊。

送齊防毒面具、遙控器、大喇叭及玩具手鎗等配件,同角色一樣咁惡搞。

零售價︰$1,580
預訂價︰$1,530
發售日期︰2012年第1季尾

相關 的新聞: